នៅថ្ងៃទី២១ ខែកុម្ភៈ ឆ្នាំ២០២៤ សាលាបឋមសិក្សាអនុត្តន៍ ហ៊ុនសែន( កម្មវិធីសាលារៀនជំនាន់ថ្មី) បានធ្វើតេស្តដំណាក់ ពង្រឹងស្តង់ដាអំណាន ដែលមានការចូលរួមជួយដោយ លោកស្រី សន សុម៉ាលីនាយិការងសាលារៀន។

នៅថ្ងៃទី១៦ ខែកុម្ភៈ ឆ្នាំ២០២៤ សិស្សឈ្មោះ វិបុល រតនាចាំងជូលី ជាសិស្សរៀនថ្នាក់ទី៦ក នៃសាលាបឋមសិក្សាអនុវត្តន៍​​​​ ហ៊ុនសែន បានចូលរួមប្រកួតក្នុងកម្មវិធីអំណាន ស្មូត តែងនិពន្ធថ្នាក់ ដែលមានក្រុមការងារខាងមន្ទីរអប់រំ យុវជន និងកីឡាខេត្តកំពង់ចាមចូលរួមជាគណៈកម្មកាវាយតម្លៃយកចំណាត់ថ្នាក់។​ សិស្សដែលបានចូលរួមប្រកួតថ្នាក់ខេត្តសរុបមានចំនួន ១៦នាក់ជាសិស្សបានវាយតម្លៃជ្រើសរើសតាមបណ្ដាលស្រុកនានាក្នុងខេត្តដោយក្រុមការងារការិយាល័យស្រុកនីមួយៗ។

សកម្មភាពមុនពេលប្រកួតអំណានល្បី

លោក លី ម៉េងសាន ជាគណៈអធិបតីយ បានសំណេះសំណាលដល់លោកគ្រូ អ្នកគ្រូ មាតាបិតា និងសិស្សានុសិស្សដែលបានចូលរួម បន្ទាប់មកលោកបានប្រកាសបើកកម្មវិធី។

លោក ជា សុខចំរើន ជាគណៈកម្មការមានមតិល្អៗ និងបានប្រកាសរបៀបវារៈក្នុងកម្មវិធីប្រកួតអំណាន ស្មូត តែងនិពន្ធ។

សកម្មភាពអំឡុងពេលប្រកួត

សកម្មភាពក្រោយពេលប្រកួត

សិស្ស វិបុល រតនាចាំងជូលី ទទួលបានចំណាត់ថ្នាក់លេខ៣ ក្នុងការប្រកួតអំណាន។

នៅថ្ងៃទី១៥ ខែកុម្ភៈ ឆ្នាំ២០២៤ សិស្សានុសិស្សថ្នាក់ទី៣ខ នៃសាលាបឋមសិក្សាអនុវត្តន៍ ហ៊ុនសែន(កម្មវិធីសាលារៀនជំនាន់ថ្មី) បានប្រឡងគូសគំនូរ ក្រោមការដឹកនាំរបស់អ្នកគ្រូ ផៃ ស្រីណុច ជាគ្រូទទួលបន្ទុកថ្នាក់ទី៣ខ មានសិស្សសរុបចំនួន ៣៦នាក់។ សាលារៀនជំនាន់ថ្មីមិនត្រឹមតែបង្រៀនសិស្សឱ្យមានចំណេះដឹងដោយបញ្ចូលនូវវិធីសាស្ត្រថ្មីៗដល់សិស្សានុសិស្សនៅពេលរៀនប៉ុណ្ណោះទេ ពេលប្រឡងក៏សុក្រឹតផងដែរ ដើម្បីឱ្យការសិក្សារបស់សិស្សទទួលបានជោគជ័យ ដោយប្រើសមត្ថភាពរបស់ខ្លួនពួកគេផ្ទាល់។ ជាក់ស្ដែងនៅថ្ងៃនេះដែរសាលាបឋមសិក្សាអនុវត្តន៍ ហ៊ុនសែន ចង់បង្ហាញពីសកម្មភាពប្រឡងគូសគំនូរសិស្សថ្នាក់ទី៣ខ តាមរយៈផ្ទាំងស្លាយដែលគ្រូបានបញ្ជាំង។

នៅជារៀងរាល់ខែសាលាបឋមសិក្សាអនុវត្តន៍ ហ៊ុនសែន(កម្មវិធីសាលារៀនជំនាន់ថ្មី) បានរៀបចំការប្រឡងប្រចាំខែចំនួន ២ថ្ងៃគ្រប់កម្រិតថ្នាក់ទាំងអស់។ នៅពេលប្រឡងសិស្សអង្គយមានគម្លាតគ្នាឆ្ងាយ ដើម្បីឱ្យការប្រឡងមានប្រសិទ្ធភាព លទ្ធផលសិក្សារបស់សិស្សតាមសមត្ថភាពរបស់ពួកគេជាក់ស្ដែង។

 

នៅថ្ងៃទី១៨ ខែមករា ឆ្នាំ២០២៤ សិស្សានុសិស្សថ្នាក់ទី៥ខ នៃសាលាបឋមសិក្សាអនុវត្តន៍ ហ៊ុនសែន(កម្មវិធីសាលារៀនជំនាន់ថ្មី) បានប្រឡងអំណាន ក្រោមការដឹកនាំរបស់លោកគ្រូ យ៉េន បញ្ញា ជាគ្រូទទួលបន្ទុកថ្នាក់ទី៥ខ មានសិស្សសរុបចំនួន ៣៦នាក់។ សាលារៀនជំនាន់ថ្មីមិនត្រឹមតែបង្រៀនសិស្សឱ្យមានចំណេះដឹងដោយបញ្ចូលនូវវិធីសាស្ត្រថ្មីៗដល់សិស្សានុសិស្សនៅពេលរៀនប៉ុណ្ណោះទេ ពេលប្រឡងក៏សុក្រឹតផងដែរ ដើម្បីឱ្យការសិក្សារបស់សិស្សទទួលបានជោគជ័យ ដោយប្រើសមត្ថភាពរបស់ខ្លួនពួកគេផ្ទាល់។ ជាក់ស្ដែងនៅថ្ងៃនេះដែរសាលាបឋមសិក្សាអនុវត្តន៍ ហ៊ុនសែន ចង់បង្ហាញពីសកម្មភាពប្រឡងអំណានសិស្សថ្នាក់ទី៥ខ។

សកម្មភាពមុនពេលអាន

លោកគ្រូបានណែនាំដល់សិស្សានុសិស្សអំពីការប្រឡងអំណាន ដោយយើងមានគណៈកម្មការចំនួន ៥រូបរងចាំចាប់កំហុសរបស់ប្អូននៅពេលដែលប្អុនអានខុសប្រក្រតីណាមួយ ដូច្នេះសូមប្អុនៗអានដោយយកចិត្តទុកដាក់ កុំភ័យខ្លាច។ លោកគ្រូក៏បានដឹកនាំសិស្សរៀបចំប្លង់តុសម្រាប់អ្នកអង្គុយអាន និងគណៈកម្មការទាំង ៥រូបដូចខាងក្រោម

• • គណៈកម្មការត្រួតពិនិត្យល្បឿនក្នុងការអាន
  • គណៈកម្មការត្រួតពិនិត្យការអានស្ទួន
  • គណៈកម្មការត្រួតពិនិត្យការអានលើស
  • គណៈកម្មការត្រួតពិនិត្យការអានខុស
  • គណៈកម្មការត្រួតពិនិត្យការអានរំលង

អំឡុងពេលប្រឡង

សិស្សានុសិស្សាបានឡើងអាន អង្គុយចំពីមុខតុគណៈកម្មការទាំង ៥រូបដោយមានភាពជឿជាក់ ពុំមានអារម្មណ៍ភ័យខ្លាច ដោយសារតែមិនថាពេលរៀន ឬរាល់ពេលប្រឡងតែងតែធ្វើសកម្មភាពបែបនេះ នោះជាហេតុធ្វើឱ្យកុមារគ្រប់រូបភាពជំនឿជាក់លើខ្លួនឯង។

ក្រោយពេលអាន

សិស្សានុសិស្សថ្នាក់ទី៥ខ ទទួលបានលទ្ធផលល្អគ្រប់ៗគ្នាសិស្សទាំង ៣៦នាក់ក្នុងការប្រឡងអំណាននេះ។​

បំណិនផ្សារភ្ចាប់នឹងជីវភាពរស់នៅប្រចាំថ្ងៃ

ក្រោយពេលសិស្សស៊ាំនឹងស្ថានភាពបែបនេះ ធ្វើឱ្យសិស្សមានភាពក្លាហានជាងសិស្សដទៃទៀតដែលពុំធ្លាប់ជួបនឹងស្ថានភាពបែបនេះ។ ធ្វើអ្វីក៏ដោយប្រសិនបើយើងមានភាពក្លាហានទុកថាយើងទទួលបានជោគជ័យ៥០%បាត់ទៅហើយ។ ក្នុងនោះជាគ្រូបង្រៀនតែងតែចង់ឃើញសិស្សជោគជ័យគ្រប់ៗគ្នា​ ដូច្នេះទើបគ្រូតែងតែសិក្សាស្រាវជ្រាវ ចូលរួមសិក្ខាសាលានានា ដើម្បីពាំនាំចំណេះដឹងទាំងនោះមកបង្រៀនសិស្សរបស់ខ្លួន។

នៅថ្ងៃទី ១៥ ខែ កញ្ញា ឆ្នាំ ២០២៣ សិស្សានុសិស្សដែលមានចំណាត់ថ្នាក់លេខ១ ដល់ ៥ បានចូលរួមប្រឡងគណិតវិទ្យាអន្ដរជាតិសឹង្ហបុរី (Singapore Mathematic Competition) ឬ ហៅកាត់ថា SMC។ ក្នុងការប្រឡងនេះ សិស្សានុសិស្សតម្រូវឱ្យមាន លេខកូដរៀងៗខ្លួន និង ធ្វើសំណួរប្រឡងទៅតាមកម្រិតថ្នាក់នីមួយៗ ចាប់ពីថ្នាក់ទី ២ ដល់ទី៦។ ការប្រឡងនេះ ជួយឱ្យសិស្សមានការគិតបែបស៊ីជម្រៅ និង គណនាលេខឱ្យបានច្បាស់លាស់។ ដោយមានការរៀបចំនិងណែនាំដោយ អ្នកគ្រូប្រឹក្សាគរុកោសល្យ អ្នកគ្រូ ម៉ៅ ស្រីណេត និង ការសម្របសម្រួលពីគ្រូបន្ទុកថ្នាក់ សិស្សានុសិស្សបានប្រឡងចប់ឱ្យជោគជ័យ។

បន្ទាប់ពីប្រឡងរួចសិស្សានុសិស្ស មានអារម្មណ៍សប្បាយរីករាយ និង ប្រកួតប្រជែងគ្នាដោយសារសំណួរមានភាពស្មុគស្មាញ។ ដោយមូលហេតុនេះហើយទើប គណគ្រប់គ្រង លោកគ្រូ អ្នកគ្រូ និង សិស្សានុសិស្សទាំងអស់កំពុងទន្ទឹងរងចាំលទ្ធផលជុំទី១ នៃការប្រឡងនេះដោយចិត្តអន្ទះសារផងដែរ។

នៅថ្ងៃទី ៨ ខែ កក្កដា ឆ្នាំ ២០២៣ សិស្សាសិស្សចំនួន បី រូប ដឹកនាំដោយអ្នកគ្រូ សន សុម៉ាលី នាយិការង  អ្នកគ្រូ ខុន ធារី អ្នកគ្រូ ទន់ សុគន្ធា អ្នកគ្រូ ឈីន បូណាវត្តី និង អ្នកគ្រូ ហ៊ោ គឺមណៃ បានចូលរួមក្នុងពិធីប្រគល់មេដាយ និង ប័ណ្ណសរសើរក្នុងការប្រឡងគណិតវិទ្យានៅឯវិទ្យាស្ថានជាតិអប់រំ (NIE) និង។ ជាលទ្ធផលបន្ទាប់ពីការប្រកួតយ៉ាងស្វិតស្វាញជាច្រើនជុំ ចាប់ផ្ដើមពីខែតុលា ឆ្នាំ ២០២២ រហូតមកដល់ឆ្នាំ ២០២៣ សិស្សានុសិស្សដែលទទួលបានមេដាយមានដូចជា៖

• កុមារា ងួន រតនៈគុណ ជាសិស្សថ្នាក់ទី ៣ក ទទួលបានមេដាយមាសចំនួន ១ គ្រឿង
• កុមារី ឃាង កណ្ណិកា ជាសិស្សថ្នាក់ទី ៥ក ទទួលបានមេដាយប្រាក់ចំនួន ១ គ្រឿង
• កុមារី ឃាង កញ្ញារ៉ា ជាសិស្សថ្នាក់ទី ៣ក ទទួលបានមេដាយសំរិទ្ធចំនួន ១​ គ្រឿង
• កុមារី ហ៊ោ ស៊ីវម៉ីវ ដែលបច្ចុប្បន្នជាសិស្សថ្នាក់ទី ៧ ទទួលបានមេដាយសំរិទ្ធចំនួន ១ គ្រឿង

 

 

នៅថ្ងៃទី ១ ខែ មិថុនា ឆ្នាំ ២០២៣ សិស្សានុសិស្សថ្នាក់ទី ៤ ដល់ទី​ ៦ ដែលបានធ្វើតាមការលក្ខខណ្ឌរបស់កម្មវិធីអំណានល្បី បានចូលរួមធ្វើបទបង្ហាញពីរឿងដែលពួកគេបានអានហើយពួកគេត្រូវបានជម្រុះដោយ អ្នកគ្រូ ម៉ៅ ស្រីណេត ដែលជាគ្រូដឹកនាំកម្មវិធីមួយនេះ។ បន្ទាប់ពីការធ្វើបទបង្ហាញដ៏គួរឱ្យចាប់អារម្មណ៍ និង ប្រកបទៅដោយខ្លឹមសារ ជាលទ្ធផលនៃការជម្រុះជុំទី១នេះ សិស្សានុសិស្សចំនួន ១៧ នាក់ត្រូវបានជ្រើសរើស។

 

កម្មវិធីអំណានល្បីនេះបង្កើតឡើងក្នុងគោលបំណងសំខាន់ៗដូចខាងក្រោម៖

1. ជម្រុញការអាន និងបង្កើនទម្លាប់នៃការសិក្សាស្រាវជ្រាវរបស់កុមារនៅក្នុងសាលារៀនយើង
2. បណ្ដុះស្មារតីចូលរួមរបស់គ្រូបង្រៀន ក្នុងការជម្រុញនិងលើកកម្ពស់ការអានរបស់សិស្ស
3. បណ្ដុះភាពក្លាហាន ភាពអំណត់ និងការចែករំលែកបទពិសោធន៍ដល់គ្នាទៅវិញទៅមក
4. បណ្ដុះបំណិននៃការគិតកម្រិតខ្ពស់ (ការគិតបែបត្រិះរិះពិចារណា និងជំនាញដោះស្រាយបញ្ហា)
5. បង្ហាញពីភាពម្ចាស់ការ និងសក្ដានុពលរបស់សិស្ស ព្រមទាំងកិត្យានុភាពរបស់សាលារៀន ។

ដំណើរការកម្មវិធី
ការជ្រើសរើសសិស្សចូលរួម

សិស្សទាំងអស់ចាប់ពីថ្នាក់ទី៤ដល់ទី៦អាចចូលរួមការប្រកួតនេះដោយស្មគ្រចិត្ត ដោយពួកគេគ្រាន់តែបំពេញទៅតាមលក្ខណមួយចំនួនដែលកម្មវិធីបានកំណត់ ដូចជាការចុះឈ្មោះចូលរួម ស្រឡាញ់ចូលចិត្តការអាន និងការសិក្សាស្រាវជ្រាវ មានសមត្ថភាពអានស្ទាត់ និងមានការឯកភាពពីគ្រូបន្ទុកថ្នាក់ និងអាណាព្យាបាលរបស់ពួកគេ ។

ការជម្រុះជុំទី ១

សិស្សចូលរួមទាំងអស់ត្រូវបានបែងចែកជាបីក្រុមទៅតាមកម្រិតថ្នាក់របស់ពួកគេ គឺក្រុមថ្នាក់ទី៤ ក្រុមថ្នាក់ទី៥ និងក្រុមថ្នាក់ទី៦ ហើយពួកគេក៏ត្រូវបានកំណត់លក្ខណនៃការប្រកួតផ្សេងៗគ្នាទៅតាមកម្រិតថ្នាក់។

• ថ្នាក់ទី៤ត្រូវអានសៀវភៅយ៉ាងតិច៤ចំណងជើង និងធ្វើកំណត់ត្រាអំណាននៃសៀវភៅនីមួយៗ
• ថ្នាក់ទី៥ត្រូវអានសៀវភៅយ៉ាងតិច៥ចំណងជើង និងធ្វើកំណត់ត្រាអំណាននៃសៀវភៅនីមួយៗ
• ថ្នាក់ទី៦ត្រូវអានសៀវភៅយ៉ាងតិច៦ចំណងជើង និងធ្វើកំណត់ត្រាអំណាននៃសៀវភៅនីមួយៗ

រាល់កំណត់ត្រាអំណានត្រូវសសេរទៅតាមលក្ខណដែលកម្មវិធីបានកំណត់ មានរបៀប ស្អាត គ្រប់ចំនួន ហើយត្រូវមានការចូលរួមគាំទ្រ និងសម្របសម្រួលពីគ្រូបន្ទុកថ្នាក់របស់ពួកគេផ្ទាល់។ បេក្ខជនដែលបានបំពេញគ្រប់លក្ខណហើយបញ្ជូនកិច្ចការមកគណៈកម្មការទាន់ពេលវេលាអាចជាប់នៅក្នុងការជម្រុះជុំទី១។